Árni veltir fyrir sér ýmsum spurningum um dýrlinga, svo sem hvernig þeir voru valdir, hvort samkeppni hafi verið milli þeirra innbyrðis og hvaða hlutverki þeir gegndu. Þá er einnig umhugsunarefni hvers vegna íslensku dýrlingarnir voru ekki viðurkenndir af páfanum. ,,Voru dýrlingar arftakar gamalla skurðgoða?“ spyr Árni Björnsson. ,,Voru þeir tekjulind? Hvernig litu dýrlingar út í lifanda lífi og hvaða menjar hafa lifað um þá fram á okkar daga?“ Loks mun Árni í leiðsögn sinni fjalla um jarteinasögur og hlutverk þeirra.
Trú á dýrlinga skipaði frá upphafi kristni í landinu mikilvægan sess í trúarlífi Íslendinga. Í Kristinna laga þætti segir meðal annars að menn skuli trúa á Guð einan og ,,á helga menn til árnaðarorðs sér og blóta eigi heiðnar vættir.” Fólk mátti trúa á og tilbiðja Guð en ákalla dýrlinga. Ef til vill hafa þeir að einhverju leyti tekið við hlutverki goðmagna og vætta. Dýrlingarnir nutu mikilla vinsælda meðal almennings og með tímanum eignuðust Íslendingar líka sína eigin dýrlinga, Jón Ögmundsson, Þorlák helga og Guðmund góða.
Sérfræðileiðsagnir Þjóðminjasafnsins, Ausið úr viskubrunnum, eru haldnar annan hvorn þriðjudag í hádeginu. Sérfræðingar bæði innan safns og utan taka þá fyrir afmarkaða hluta grunnsýningarinnar og sérsýninga í samræmi við sérfræðiþekkingu sína. Leiðsagnirnar eru ætlaðar almenningi og ættu allir að hafa gaman af.
Fólk er hvatt til að fjölmenna næstkomandi þriðjudag og hlusta á Árna Björnsson tala um íslenska dýrlinga.
Sérfræðileiðsögn Árna Björnssonar þjóðháttafræðings í Þjóðminjasafni Íslands, 19. febrúar kl. 12:05
Íslenskir dýrlingar – Ausið úr viskubrunnum í Þjóðminjasafni Íslands – Sérfræðileiðsögn Árna Björnssonar þjóðháttafræðings þriðjudaginn 19. febrúar klukkan 12:05
Þriðjudaginn 19. febrúar klukkan 12:05 verður ,,ausið úr viskubrunnum” í Þjóðminjasafni Íslands en þá verður Árni Björnsson þjóðháttafræðingur með leiðsögn um grunnsýninguna. Árni mun kynna gesti sérstaklega fyrir myndum af íslenskum dýrlingum í safninu.