Í erindi sínu mun Einar Falur fjalla um pílagrímsferðir sem listaverk
kveikja, út frá túlkun þeirra Williams Gershoms Collingwoods á stöðum sem
koma fyrir í Íslendingasögunum. Á sýningunni Sögustaðir – í fótspor W.G.
Collingwoods sem nú er í Bogasal Þjóðminjasafns Íslands, og í samnefndri
bók, birtast myndir þeirra tveggja af stöðum sem oft láta lítið yfir sér
en eru hlaðnir sögulegri merkingu.
Á sýningunni má sjá úrval ljósmynda Einars Fals og að auki hluta þeirra
rúmlega 300 verka sem Collingwood málaði hér á landi, en ríflega helmingur
myndanna frá ferð hans eru varðveittar í Þjóðminjasafninu.
W.G. Collingwood kom til landsins til að mála myndir af stöðum sem koma
fyrir í Íslendingasögunum og um leið skapaði hann merkar heimildir um
íslenskan samtíma. Síðustu þrjú ár hefur Einar Falur notið leiðsagnar
Collingwoods á ferð sinni milli íslenskra sögustaða. Hann hefur farið
milli staða þar sem breski listamaðurinn vann og stuðst við myndverk hans
og skrif. Í ljósmyndum Einars Fals verður til samtal þriggja tíma; samtíma
áhorfandans í dag, samtíma Collingwoods árið 1897 og sögualdarinnar, sem
Bretinn hyllti í myndverkum sínum.
Í samnefndri bók, sem Þjóðminjasafn Íslands og Crymogea gefa út, birtast
enn fleiri myndir úr verkefninu, auk ítarlegs texta ljósmyndarans um
verkefnið, ljósmyndun, málaralist, ferðalagið og tímann.
„Ókunnugir ferðalangar biðja ávallt um leiðsögumann“ Pílagrímsferðir um Sögustaði og myndir úr ferðalögum
Þriðjudaginn 16. nóvember kl. 12:05 mun Einar Falur Ingólfsson flytja
erindið “Ókunnugir ferðalangar biðja ávallt um leiðsögumann” –
Pílagrímsferðir um sögustaði og myndir úr ferðalögum. Aðgangur er ókeypis
og allir velkomnir.