Dr. Hugh Reid kennir við enskudeild Carleton University í Ottawa í Kanada. Hann lauk doktorsnámi frá University of London og hefur rannsakað ýmis svið bókmennta og sögu 18. aldar, einkum bókaútgáfu og rithöfundana Joseph Warton og Thomas Warton, eldri og yngri.
Hugh Reid: Áskriftarlistar við bókaútgáfu á átjándu öld
Fyrirlestur á vegum Sagnfræðingafélags Íslands. Húsi Sögufélags við Fischersund, miðvikudaginn 30. sept. kl. 20:00.
Þótt ýmsir fræðimenn hafi rannsakað notkun áskriftarlista við bókaútgáfu á átjándu öld er margt enn ókannað í þessum efnum. Til dæmis mætti spyrja hvernig Alexander Pope tókst að ná undir sig fótum fjárhagslega með því að gefa út bækur á þennan hátt, eða hvers vegna fleiri konur gerðust áskrifendur að sumum verkum hans frekar en öðrum sem gefin voru út í áskrift. Hvað getur hlutfall kvenna, prestlærðra, kaupmanna eða annarra í hópi áskrifenda sagt okkur um það hvað hverjir lásu hverju sinni? Hvernig fór útgáfa bóka í gegnum áskrift fram? Hve viðamikil var sú aðferð í samanburði við annars konar bókaútgáfu? Hverjir gerðust áskrifendur að bókum og hvers vegna? Reynt verður að svara spurningum af þessu tagi í fyrirlestrinum.
Aðgangur er ókeypis og öllum heimill.